اشىق حات!

ق ر پرەزيدەنتى نۇرسۇلتان نازاربايەۆتىڭ: «ۇلى دالانىڭ جەتى قىرى» باستاماسى – ءبىزدىڭ قازاقتىڭ عانا ەمەس، بارشا تۇرىك حالىقتارىنىڭ سان مىڭ جىلدىق تاريحىن ءدۇر سىلكىندىرۋگە باستاما بولسا جارار ەدى. انا قۇلدىق سانادان ءالى ارىلا الماي جۇرگەن «ءشۇلدىربايلار» مەن «شۇلدىربيكەلەر» قۇلدىق دورەكى مىنەزگە باسىپ، ءبارىن بۇلدىرە مە دەپ قورقاتىنىم، تاعى دا جالعان ەمەس. ويتكەنى، ونىڭ وزىندىك سەبەبى جەتەرلىگىن بۇكىل قازاق جاقسى بىلەدى.

1992-2002 جىلدارى سول كەزدەگى قازاق تەليەۆيزياسىنىڭ يمانباي جۇباي باسقارعان «تاڭ شولپان» تاڭعى باعدارلاماسىنان تىكەلەي ەفيردە ءار اپتانىڭ بەيسەنبى كۇندەرى تۇراقتى تۇردە  اۋەلگىدە نە بارى 7 مينۋت تەلەحابار بولسا، كەيىن حرونومەتراجى 30 مينۋتتىق ءوزىم جۇرگىزگەن اۆتورلىق تەلەجوبام «تۇرىك دانالارىنا» اينالعانىن كوزى قاراقتى كورەرمەندەر ءالى ۇمىتا قويماعان شىعار دەيمىن. 

وسىناۋ سان مىڭ جىلدىق تاريحى بار ۇلى دالادان شىققان: اناحارسيس، يشپاحاي، توميريس، زارينا، مودە قاعان، اتيللا، كۇلتەگىننەن، ماعجان جۇمابايعا، اتاتۇرىك، مۇستافا شوقايعا دەيىنگى ارالىقتى قامتىعان 40-تان استام تەلەحابارلارىم بۇگىندە قازاق تەليەۆيزياسىنىڭ التىن قورىندا جاتقانىنان حاباردارمىن. ول تەلەحاباردىڭ كوپشىلىگى توزا باستاعانى تاعى دا راس.  تۇركيا مەن ءازىربايجان تەليەۆيزياسى سول مەنىڭ اۆتورلىق تەلەجوبام  «تۇرىك دانالارىن» تەلەەكراندارىنان جانە سايتتارىنان ۇزبەي كورسەتىپ كەلە جاتقانى وتىرىك ەمەس (عالامتوردان ىزدەپ تابۋ قيىن ەمەس).

وسى جوبامدى قايتا ءتىرىلتۋ كەرەكتىگى تۋرالى سان رەت جازدىم دا. ءبىراق، ازىرگە قۇلاق اسقان جاندى كورمەدىم.

قۇرمەتتى ەرلان قارين مىرزا!

وسىناۋ «تۇرىك دانالارى» اتتى تەلەجوبامدى قايتا جاڭعىرتۋعا مۇمكىندىك تۋدىرساڭىز، جالعىز مەن عانا ەمەس، ۇلتتىق تاريحقا شولدەپ وتىرعان قالىڭ كورەرمەننىڭ دە العىسىنا بولەنەرىمىز داۋسىز...

وزىڭىزدەن قۋانىشتى حابار كۇتۋشى،

قازاق تەليەۆيزياسىنىڭ ارداگەرى، قازاق جۋرناليستيكاسىنىڭ قايراتكەرى، حالىقارالىق يۋنەسكو سىيلىعىنىڭ يەگەرى، اقىن، پۋبليسيست

جۇماش كەنەباي (كوكبورى)